ਪੰਜਾਬ ਸਰਕਾਰ ਦੀ ਵੱਡੀ ਭਰਤੀ ਮੁਹਿੰਮ ਨੂੰ ਮਨਜ਼ੂਰੀ – ਸਿਹਤ ਵਿਭਾਗ ‘ਚ 619 ਅਤੇ ਉਦਯੋਗ ਵਿਭਾਗ ‘ਚ 97 ਅਸਾਮੀਆਂ ਭਰੀਆਂ ਜਾਣਗੀਆਂ।

Director : Manvir Singh Walia 

Editor : Jatin Kumar Sahota 

ਜਲੰਧਰ, 2 ਜੁਲਾਈ : Prime Punjab 

ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਨੇ ਸਿਹਤ ਤੇ ਉਦਯੋਗ ਵਿਭਾਗ ਦੀਆਂ ਖਾਲੀ ਅਸਾਮੀਆਂ ਭਰਨ ਲਈ ਪ੍ਰਸ਼ਾਸਨਿਕ ਪ੍ਰਵਾਨਗੀ ਦੇ ਦਿੱਤੀ। ਇਸ ਤਹਿਤ ਸਿਹਤ ਵਿਭਾਗ ‘ਚ ਮਲਟੀਪਰਪਜ਼ ਹੈਲਥ ਵਰਕਰ (ਮਹਿਲਾ) ਦੀਆਂ ਗਰੁੱਪ-ਸੀ ਦੀਆਂ 619 ਅਸਾਮੀਆਂ ਅਤੇ ਉਦਯੋਗ ਵਿਭਾਗ ‘ਚ 97 ਅਸਾਮੀਆਂ ‘ਤੇ ਤੁਰੰਤ ਭਰਤੀ ਹੋਵੇਗੀ।

ਸਿਹਤ ਖੇਤਰ ਦੀ ਭਰਤੀ ਬਾਰੇ ਚੀਮਾ ਨੇ ਦੱਸਿਆ ਕਿ 619 ਅਸਾਮੀਆਂ ‘ਚ 220 ਸਿੱਧੀ ਭਰਤੀ, 346 ਤਰੱਕੀ ਵਾਲੀਆਂ ਅਤੇ 53 ਪਹਿਲਾਂ ਖ਼ਤਮ ਕੀਤੀਆਂ ਗਈਆਂ ਅਸਾਮੀਆਂ ਸ਼ਾਮਲ ਹਨ। ਨਿਯੁਕਤੀਆਂ ਲਈ ਪੇ-ਸਕੇਲ ₹21,700-₹69,100 ਲੈਵਲ-3 ਰੱਖਿਆ ਗਿਆ ਹੈ। ਭਰਤੀ ਪ੍ਰਕਿਰਿਆ ਨੂੰ ਤੇਜ਼ ਕਰਨ ਲਈ ਇਹ ਕੰਮ ਪੰਜਾਬ ਅਧੀਨ ਸੇਵਾਵਾਂ ਚੋਣ ਬੋਰਡ ਦੀ ਬਜਾਏ ਬਾਬਾ ਫ਼ਰੀਦ ਯੂਨੀਵਰਸਿਟੀ ਆਫ਼ ਹੈਲਥ ਸਾਇੰਸਿਜ਼, ਫ਼ਰੀਦਕੋਟ ਰਾਹੀਂ ਕਰਵਾਇਆ ਜਾਵੇਗਾ। ਇਸ ‘ਤੇ ਸਾਲਾਨਾ ₹16.12 ਕਰੋੜ ਦਾ ਵਿੱਤੀ ਬੋਝ ਪਵੇਗਾ।

ਉਦਯੋਗ ਵਿਭਾਗ ਲਈ 97 ਅਸਾਮੀਆਂ ਦੇ ਇਸ਼ਤਿਹਾਰ ਦੀ ਇਜਾਜ਼ਤ ਦਿੱਤੀ ਗਈ ਹੈ। ਵਿੱਤ ਮੰਤਰੀ ਨੇ ਦੱਸਿਆ ਕਿ 2020 ਦੇ ਪੁਨਰਗਠਨ ਦੌਰਾਨ ਵਿਭਾਗ ਨੇ 721 ਅਸਾਮੀਆਂ ਸਰੈਂਡਰ ਕਰ ਦਿੱਤੀਆਂ ਸਨ, ਜਿਸ ਨਾਲ ਸਮਰੱਥਾ ‘ਚ 42% ਕਮੀ ਆਈ ਸੀ। ਹੁਣ ਕੰਮਕਾਜ ਸੁਧਾਰਨ ਲਈ ਸਟਾਫ਼ ਵਧਾਇਆ ਜਾ ਰਿਹਾ ਹੈ।

ਚੀਮਾ ਨੇ ਵਿਭਾਗ ਨੂੰ ਹਦਾਇਤ ਕੀਤੀ ਕਿ ਉਹ ਆਪਣੀਆਂ ਪ੍ਰਸ਼ਾਸਨਿਕ ਭੂਮਿਕਾਵਾਂ ਦੇ ਅਨੁਸਾਰ ਤੁਰੰਤ ਵਿਆਪਕ ਪੁਨਰਗਠਨ ਸਮੀਖਿਆ ਕਰਕੇ ਵਿੱਤ ਵਿਭਾਗ ਨੂੰ ਪ੍ਰਸਤਾਵ ਭੇਜੇ। ਉਨ੍ਹਾਂ ਕਿਹਾ ਕਿ ਇਹ ਭਰਤੀਆਂ ਜ਼ਮੀਨੀ ਪੱਧਰ ‘ਤੇ ਸਿਹਤ ਸੇਵਾਵਾਂ ਮਜ਼ਬੂਤ ਕਰਨ ਅਤੇ ਵਪਾਰਕ ਪ੍ਰਸ਼ਾਸਨ ਸਥਿਰ ਕਰਨ ਦੇ ਉਦੇਸ਼ ਨਾਲ ਕੀਤੀਆਂ ਜਾ ਰਹੀਆਂ ਹਨ।