ਗੈਰ-ਕਾਨੂੰਨੀ ਨਿਰਮਾਣ: ਜਲੰਧਰ ਦੇ ਮੈਰਿਟਨ ਹੋਟਲ ਨੂੰ ਸੀਲ ਕਰਨ ਦੇ ਆਦੇਸ਼, ਬਿਜਲੀ-ਪਾਣੀ ਕੱਟਣ ਦੀ ਤਿਆਰੀ।

ਜਲੰਧਰ, 24 ਜੁਲਾਈ : Prime Punjab 

ਜਲੰਧਰ ਨਗਰ ਨਿਗਮ ਨੇ ਸ਼ਹਿਰ ਦੇ ਮਸ਼ਹੂਰ ਮੈਰਿਟਨ ਹੋਟਲ ’ਤੇ ਸਖ਼ਤ ਕਾਰਵਾਈ ਕਰਦੇ ਹੋਏ ਇਸਨੂੰ ਸੀਲ ਕਰਨ ਦੇ ਆਦੇਸ਼ ਜਾਰੀ ਕਰ ਦਿੱਤੇ ਹਨ। ਮੇਅਰ ਵਨੀਤ ਧੀਰ ਦੇ ਨਿਰਦੇਸ਼ਾਂ ’ਤੇ ਐਮ.ਟੀ.ਪੀ ਇਕਬਾਲਪ੍ਰੀਤ ਸਿੰਘ ਰੰਧਾਵਾ ਨੇ ਇਹ ਕਾਰਵਾਈ ਕੀਤੀ ਹੈ। ਨਿਗਮ ਦਾ ਦੋਸ਼ ਹੈ ਕਿ ਹੋਟਲ ਗੈਰ-ਕਾਨੂੰਨੀ ਤੌਰ ’ਤੇ ਬਣਾਇਆ ਗਿਆ ਹੈ ਅਤੇ ਨੋਟਿਸਾਂ ਦੇ ਬਾਵਜੂਦ ਹੋਟਲ ਪ੍ਰਬੰਧਨ ਨੇ ਕੋਈ ਜਵਾਬ ਨਹੀਂ ਦਿੱਤਾ।

ਨਗਰ ਨਿਗਮ ਨੇ ਹੋਟਲ ਮਾਲਕ ਨੂੰ ਪਹਿਲਾਂ 9 ਫਰਵਰੀ ਅਤੇ ਫਿਰ 7 ਮਈ 2026 ਨੂੰ ਨੋਟਿਸ ਭੇਜੇ ਸਨ। ਜਦੋਂ ਕੋਈ ਹੱਲ ਨਾ ਨਿਕਲਿਆ ਤਾਂ 22 ਜੁਲਾਈ 2026 ਨੂੰ ਤੀਜਾ ਅਤੇ ਆਖਰੀ ਨੋਟਿਸ ਜਾਰੀ ਕੀਤਾ ਗਿਆ ਹੈ। ਐਮ.ਟੀ.ਪੀ ਰੰਧਾਵਾ ਨੇ ਕਿਹਾ ਕਿ ਹੋਟਲ ਨੂੰ ਤੁਰੰਤ ਖਾਲੀ ਕਰਨ ਦੇ ਹੁਕਮ ਦਿੱਤੇ ਗਏ ਹਨ ਅਤੇ ਕਿਸੇ ਵੀ ਸਮੇਂ ਸਰਕਾਰੀ ਤਾਲਾ ਲਗਾਇਆ ਜਾ ਸਕਦਾ ਹੈ।

ਹੋਟਲ ਨੂੰ ਪੂਰੀ ਤਰ੍ਹਾਂ ਬੰਦ ਕਰਨ ਲਈ ਨਗਰ ਨਿਗਮ ਨੇ PSPCL ਅਤੇ O&M ਬ੍ਰਾਂਚ ਨੂੰ ਵੀ ਚਿੱਠੀ ਲਿਖੀ ਹੈ। ਇਸ ਵਿੱਚ ਮੈਰਿਟਨ ਹੋਟਲ ਦਾ ਬਿਜਲੀ, ਪਾਣੀ ਅਤੇ ਸੀਵਰੇਜ ਕਨੈਕਸ਼ਨ ਤੁਰੰਤ ਕੱਟਣ ਲਈ ਕਿਹਾ ਗਿਆ ਹੈ ਤਾਂ ਜੋ ਹੋਟਲ ਦਾ ਸੰਚਾਲਨ ਪੂਰੀ ਤਰ੍ਹਾਂ ਰੋਕਿਆ ਜਾ ਸਕੇ।