ਕਾਲੀਆ ਕਲੋਨੀ ਫੇਜ਼-1 ਤੋਂ ਫੇਜ਼-2 ਜਾਣ ਵਾਲੀ ਪੁਲੀ ਜਰਜਰ ਹਾਲਤ ‘ਚ, ਪ੍ਰਸ਼ਾਸਨ ਬੇਸੁਰਤ – ਕੀ ਕਿਸੇ ਵੱਡੇ ਹਾਦਸੇ ਦਾ ਕੀਤਾ ਜਾ ਰਿਹਾ ਇੰਤਜ਼ਾਰ?

Director : Manvir Singh Walia 

Editor : Jatin Kumar Sahota 

ਜਲੰਧਰ, 06 ਅਗਸਤ : Prime Punjab 

ਕਾਲੀਆ ਕਲੋਨੀ ਫੇਜ਼-1 ਤੋਂ ਫੇਜ਼-2 ਅਤੇ ਗੁਰੂ ਅਮਰਦਾਸ ਨਗਰ ਨੂੰ ਜਾਂਦੀ ਪੁਲੀ ਦਾ ਕੰਮ 10 ਦਿਨ ਬੀਤ ਜਾਣ ਤੋਂ ਬਾਅਦ ਵੀ ਬੰਦ ਪਿਆ ਹੈ। ਪੁਲੀ ਦੀ ਹਾਲਤ ਇੰਨੀ ਖ਼ਰਾਬ ਹੈ ਕਿ ਇਹ ਕਦੇ ਵੀ ਡਿੱਗ ਸਕਦੀ ਹੈ।

ਰੋਜ਼ਾਨਾ ਸੈਂਕੜੇ ਲੋਕ, ਬੱਚੇ ਅਤੇ ਸਕੂਲ ਜਾਣ ਵਾਲੇ ਵਿਦਿਆਰਥੀ ਆਪਣੀ ਜਾਨ ਜੋਖਮ ‘ਚ ਪਾ ਕੇ ਇਸ ਪੁਲੀ ਉੱਪਰੋਂ ਲੰਘਣ ਨੂੰ ਮਜਬੂਰ ਹਨ। 10 ਦਿਨ ਪਹਿਲਾਂ ਪੁਲੀ ਦੇ ਦੋਵੇਂ ਪਾਸੇ ਥੋੜ੍ਹਾ ਬਹੁਤ ਮਟੀਰੀਅਲ ਸੁੱਟ ਕੇ ਕੰਮ ਛੱਡ ਦਿੱਤਾ ਗਿਆ ਸੀ। ਉਸ ਤੋਂ ਬਾਅਦ ਨਾ ਕੋਈ ਅਧਿਕਾਰੀ ਆਇਆ, ਨਾ ਹੀ ਕੋਈ ਮਜ਼ਦੂਰ।

ਬਰਸਾਤ ਦੇ ਮੌਸਮ ‘ਚ ਪਾਣੀ ਦਾ ਵਹਾਅ ਤੇਜ਼ ਹੋਣ ਕਾਰਨ ਪੁਲੀ ਦੇ ਟੁੱਟਣ ਦਾ ਖ਼ਤਰਾ ਹੋਰ ਵੱਧ ਗਿਆ ਹੈ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਪ੍ਰਸ਼ਾਸਨ ਵੱਲੋਂ ਉੱਥੇ ਕੋਈ ਸੁਰੱਖਿਆ ਬੋਰਡ ਜਾਂ ਸਾਈਨ ਬੋਰਡ ਵੀ ਨਹੀਂ ਲਗਾਇਆ ਗਿਆ। 

ਇਲਾਕਾ ਵਾਸੀਆਂ ਦਾ ਕਹਿਣਾ ਹੈ ਕਿ ਪ੍ਰਸ਼ਾਸਨ ਕਿਸੇ ਵੱਡੇ ਹਾਦਸੇ ਦਾ ਇੰਤਜ਼ਾਰ ਕਰ ਰਿਹਾ ਹੈ। ਉਨ੍ਹਾਂ ਮੰਗ ਕੀਤੀ ਹੈ ਕਿ ਪੁਲੀ ਦਾ ਕੰਮ ਤੁਰੰਤ ਸ਼ੁਰੂ ਕਰਵਾਇਆ ਜਾਵੇ ਅਤੇ ਜਦੋਂ ਤੱਕ ਕੰਮ ਨਹੀਂ ਹੁੰਦਾ ਉਦੋਂ ਤੱਕ ਵਿਕਲਪਕ ਰਸਤੇ ਅਤੇ ਸੁਰੱਖਿਆ ਪ੍ਰਬੰਧ ਕੀਤੇ ਜਾਣ।