ਪੰਜਾਬ, 02 ਸਤੰਬਰ : Prime Punjab
ਪੰਜਾਬ ਨੇ ਮਨੁੱਖਤਾ ਦੀ ਮਿਸਾਲ ਪੇਸ਼ ਕਰਦੇ ਹੋਏ ਦੇਸ਼ ‘ਚ ਇਤਿਹਾਸ ਰਚ ਦਿੱਤਾ ਹੈ। ਪੰਜਾਬ ਅਣਪਛਾਤੀਆਂ ਅਤੇ ਲਾਵਾਰਿਸ ਲਾਸ਼ਾਂ ਦੀ ਡਿਜੀਟਲ ਸ਼ਨਾਖਤ ਲਈ ਸੂਬਾ ਪੱਧਰੀ ਪੋਰਟਲ ‘ਪਹਿਚਾਣ’ ਸ਼ੁਰੂ ਕਰਨ ਵਾਲਾ ਦੇਸ਼ ਦਾ ਪਹਿਲਾ ਸੂਬਾ ਬਣ ਗਿਆ ਹੈ। ਸਿਹਤ ਮੰਤਰੀ ਡਾ. ਬਲਬੀਰ ਸਿੰਘ ਨੇ ਚੰਡੀਗੜ੍ਹ ‘ਚ ਇਸ ਪੋਰਟਲ ਨੂੰ ਰਸਮੀ ਤੌਰ ‘ਤੇ ਲਾਂਚ ਕੀਤਾ।
ਇਸ ਪਹਿਲਕਦਮੀ ਤਹਿਤ ਸੂਬੇ ਦੇ ਕਿਸੇ ਵੀ ਸਰਕਾਰੀ ਮੁਰਦਾਘਰ ‘ਚ ਆਉਣ ਵਾਲੀ ਹਰ ਅਣਪਛਾਤੀ ਲਾਸ਼ ਦੀ ਪੋਸਟਮਾਰਟਮ ਤੋਂ 48 ਘੰਟੇ ਦੇ ਅੰਦਰ ਫੋਟੋ, ਟੈਟੂ, ਜਨਮ ਨਿਸ਼ਾਨ ਜਾਂ ਸਰੀਰਕ ਹੁਲੀਆ ਪੋਰਟਲ ‘ਤੇ ਅਪਲੋਡ ਕੀਤਾ ਜਾਵੇਗਾ। ਦੇਸ਼-ਵਿਦੇਸ਼ ‘ਚ ਬੈਠਾ ਕੋਈ ਵੀ ਪਰਿਵਾਰ ਬਿਨਾਂ ਕੋਈ ਫੀਸ ਦਿੱਤੇ ਸਿਹਤ ਵਿਭਾਗ ਦੀ ਵੈੱਬਸਾਈਟ ‘ਤੇ ਜਾ ਕੇ ਆਪਣੇ ਗੁੰਮਸ਼ੁਦਾ ਵਿਅਕਤੀ ਦੀ ਭਾਲ ਕਰ ਸਕੇਗਾ ਅਤੇ ਆਨਲਾਈਨ ਦਾਅਵਾ ਕਰ ਸਕੇਗਾ। ਦਾਅਵਾ ਕਰਦੇ ਹੀ ਸਬੰਧਤ ਜਾਂਚ ਅਧਿਕਾਰੀ ਨੂੰ ਆਟੋਮੈਟਿਕ ਸੂਚਨਾ ਚਲੀ ਜਾਵੇਗੀ।
ਸਿਹਤ ਮੰਤਰੀ ਨੇ ਕਿਹਾ, “ਸਿਰਫ਼ ਪੰਜਾਬ ‘ਚ ਹੀ ਹਰ ਸਾਲ 5,000 ਤੋਂ 6,000 ਵਿਅਕਤੀ ਲਾਵਾਰਿਸ ਹਾਲਤ ‘ਚ ਦਮ ਤੋੜ ਦਿੰਦੇ ਹਨ। ਉਹ ਕਿਸੇ ਦੇ ਪੁੱਤਰ, ਧੀ ਜਾਂ ਪਿਤਾ ਹੋ ਸਕਦੇ ਹਨ। ਜਿਉਂਦੇ ਵਿਅਕਤੀਆਂ ਦੀ ਸਿਹਤ ਸੰਭਾਲ ਵਾਂਗ ਮ੍ਰਿਤਕਾਂ ਦਾ ਸਨਮਾਨ ਵੀ ਸਾਡੀ ਜ਼ਿੰਮੇਵਾਰੀ ਹੈ।” ਇਹ ਪੋਰਟਲ NIC ਵੱਲੋਂ ਬਣਾਏ ‘ਮੈਡਲੀਪਰ’ ਸਾਫਟਵੇਅਰ ‘ਤੇ ਆਧਾਰਿਤ ਹੈ, ਜਿਸ ‘ਤੇ ਪੰਜਾਬ ਦੇ 23 ਜ਼ਿਲ੍ਹਿਆਂ ਦੇ 346 ਹਸਪਤਾਲਾਂ ‘ਚ 12 ਲੱਖ ਤੋਂ ਵੱਧ ਕੇਸ ਦਰਜ ਹਨ।
ਇਹ ਪੋਰਟਲ CCTNS (ਕ੍ਰਾਈਮ ਟਰੈਕਿੰਗ ਨੈੱਟਵਰਕ) ਨਾਲ ਜੁੜਿਆ ਹੋਵੇਗਾ ਤਾਂ ਜੋ ਗੁੰਮਸ਼ੁਦਾ ਵਿਅਕਤੀਆਂ ਦਾ ਰਿਕਾਰਡ ਆਟੋਮੈਟਿਕ ਮੈਚ ਹੋ ਸਕੇ। ਇਹ ਪੂਰੀ ਤਰ੍ਹਾਂ ਡਿਜੀਟਲ ਪਰਸਨਲ ਡਾਟਾ ਪ੍ਰੋਟੈਕਸ਼ਨ ਐਕਟ 2023 ਦੀ ਪਾਲਣਾ ਕਰਦਾ ਹੈ। ਇਸ ਮਾਡਲ ਨੂੰ ਦੇਸ਼ ਦੇ 30 ਰਾਜ ਪਹਿਲਾਂ ਹੀ ਅਪਣਾ ਰਹੇ ਹਨ। ਪਰਿਵਾਰਾਂ ਨੂੰ ਹੁਣ ਮੁਰਦਾਘਰਾਂ ਅਤੇ ਥਾਣਿਆਂ ਦੇ ਚੱਕਰ ਨਹੀਂ ਕੱਟਣੇ ਪੈਣਗੇ।


More Stories
ਡੀ.ਏ.ਵੀ. ਯੂਨੀਵਰਸਿਟੀ ‘ਚ ਏ.ਆਈ.ਯੂ. ਉੱਤਰੀ ਜ਼ੋਨ ਵਾਲੀਬਾਲ ਚੈਂਪੀਅਨਸ਼ਿਪ ਸ਼ੁਰੂ, 97 ਯੂਨੀਵਰਸਿਟੀਆਂ ਦੀਆਂ ਟੀਮਾਂ ਲੈ ਰਹੀਆਂ ਭਾਗ।
ASI ਇਕਬਾਲ ਸਿੰਘ ਕਤਲ ਕੇਸ ‘ਚ AGTF ਨੂੰ ਵੱਡੀ ਸਫਲਤਾ, ਦੂਜਾ ਸ਼ੂਟਰ ਅੰਮ੍ਰਿਤਸਰ ਤੋਂ ਗ੍ਰਿਫ਼ਤਾਰ, ਦੋਵੇਂ ਸ਼ੂਟਰ ਕਾਬੂ।
ਗੁਰੂ ਨਾਨਕ ਦੇਵ ਜੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਵਿਸ਼ਾਲ ਨਗਰ ਕੀਰਤਨ ਦਾ ਭਾਜਪਾ ਨੇ ਕੀਤਾ ਸ਼ਾਨਦਾਰ ਸਵਾਗਤ, ਫੁੱਲਾਂ ਦੀ ਵਰਖਾ ਤੇ ਪ੍ਰਸ਼ਾਦ ਵੰਡਿਆ।