ਜਲੰਧਰ, 18 ਨਵੰਬਰ : Prime Punjab
ਡੀਏਵੀ ਯੂਨੀਵਰਸਿਟੀ, ਜਲੰਧਰ ਵਿਖੇ ‘ਕ੍ਰੀਏਟ, ਬ੍ਰਾਂਡ, ਸੈਲ’ ਥੀਮ ਤਹਿਤ ਬੂਥ ਐਕਸਪੋ 2026 ਦਾ ਸਫਲ ਆਯੋਜਨ ਕੀਤਾ ਗਿਆ। ਕਾਮਰਸ, ਬਿਜ਼ਨਸ ਮੈਨੇਜਮੈਂਟ ਅਤੇ ਇਕਨਾਮਿਕਸ ਵਿਭਾਗ ਵੱਲੋਂ ਕਰਵਾਏ ਗਏ ਇਸ ਐਕਸਪੋ ਦਾ ਮੁੱਖ ਉਦੇਸ਼ ਵਿਦਿਆਰਥੀਆਂ ਨੂੰ ਆਪਣੀ ਉਦਮਸ਼ੀਲਤਾ, ਰਚਨਾਤਮਕਤਾ ਅਤੇ ਮਾਰਕੀਟਿੰਗ ਦੇ ਹੁਨਰਾਂ ਨੂੰ ਪ੍ਰਦਰਸ਼ਿਤ ਕਰਨ ਲਈ ਮੰਚ ਦੇਣਾ ਸੀ। ਵਿਦਿਆਰਥੀਆਂ ਨੇ ਆਪਣੇ ਨਵੇਂ ਅਤੇ ਨਿਵੇਕਲੇ ਉਤਪਾਦਾਂ ਤੇ ਵਪਾਰਕ ਵਿਚਾਰਾਂ ਨਾਲ ਵੱਖ-ਵੱਖ ਸਟਾਲ ਲਗਾਏ।
ਇਸ ਸਮਾਗਮ ਵਿੱਚ ਕੁੱਲ 35 ਟੀਮਾਂ ਨੇ ਉਤਸ਼ਾਹ ਨਾਲ ਭਾਗ ਲਿਆ ਅਤੇ ਆਪਣੇ ਉਤਪਾਦਾਂ, ਬ੍ਰਾਂਡਿੰਗ ਰਣਨੀਤੀਆਂ, ਪੈਕੇਜਿੰਗ ਤੇ ਵਿਕਰੀ ਦੇ ਹੁਨਰਾਂ ਦਾ ਪ੍ਰਦਰਸ਼ਨ ਕੀਤਾ। ਐਕਸਪੋ ਰਾਹੀਂ ਵਿਦਿਆਰਥੀਆਂ ਨੂੰ ਉਤਪਾਦ ਦੀ ਬਾਜ਼ਾਰ ‘ਚ ਪਛਾਣ ਬਣਾਉਣ, ਕੀਮਤ ਨਿਰਧਾਰਨ ਕਰਨ, ਮਾਰਕੀਟਿੰਗ ਅਤੇ ਗਾਹਕਾਂ ਨਾਲ ਪ੍ਰਭਾਵਸ਼ਾਲੀ ਸੰਚਾਰ ਦਾ ਵਿਹਾਰਕ ਤਜਰਬਾ ਮਿਲਿਆ।
ਵਿਦਿਆਰਥੀਆਂ ਨੂੰ ਸੰਬੋਧਨ ਕਰਦਿਆਂ ਉਪ-ਕੁਲਪਤੀ ਪ੍ਰੋ. (ਡਾ.) ਮਨੋਜ ਕੁਮਾਰ ਨੇ ਕਿਹਾ ਕਿ ਅਜਿਹੇ ਮੰਚ ਵਿਦਿਆਰਥੀਆਂ ਨੂੰ ਆਪਣੀ ਉਦਮਸ਼ੀਲਤਾ ਦੀ ਸਮਰੱਥਾ ਪਛਾਣਨ, ਸਿਹਤਮੰਦ ਮੁਕਾਬਲੇ ਦੀ ਭਾਵਨਾ ਅਤੇ ਟੀਮ ਵਰਕ ਵਿਕਸਿਤ ਕਰਨ ਦਾ ਮੌਕਾ ਦਿੰਦੇ ਹਨ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਕਲਾਸਰੂਮ ਦਾ ਸਿਧਾਂਤਕ ਗਿਆਨ ਅਮਲੀ ਰੂਪ ‘ਚ ਲਾਗੂ ਹੁੰਦਾ ਹੈ ਅਤੇ ਆਤਮ-ਵਿਸ਼ਵਾਸ ਤੇ ਰਚਨਾਤਮਕਤਾ ਵਧਦੀ ਹੈ। ਯੂਨੀਵਰਸਿਟੀ ਨਵੀਨਤਾ ਤੇ ਤਜਰਬੇ ਅਧਾਰਿਤ ਸਿੱਖਿਆ ਲਈ ਵਚਨਬੱਧ ਹੈ।
ਮੁਕਾਬਲੇ ‘ਚ ਡਾ. ਆਸ਼ੂਤੋਸ਼ ਗੁਪਤਾ, ਡਾ. ਰਾਜੇਸ਼ ਸ਼ੰਕਰ ਸ਼ਰਮਾ ਅਤੇ ਸੁਸ਼੍ਰੀ ਪੂਰਵੀ ਨੇ ਜੱਜ ਦੀ ਭੂਮਿਕਾ ਨਿਭਾਈ। ਨਤੀਜਿਆਂ ‘ਚ ਸਿਮਰਨ ਜੂਈਸੇਨਜ਼ (ਸਟਾਲ ਨੰ. 2 – ਸਿਮਰਨਪ੍ਰੀਤ ਕੌਰ) ਨੇ ਪਹਿਲਾ, ਕ੍ਰਾਫਟੀ ਕ੍ਰੋਸ਼ੇ ਕਾਰਨਰ (ਸਟਾਲ ਨੰ. 1 – ਰੀਆ ਰਾਜ) ਨੇ ਦੂਜਾ ਅਤੇ ਪ੍ਰਿਟੀ ਪੈਲੇਟ (ਸਟਾਲ ਨੰ. 30 – ਖੁਸ਼ਬੂ) ਨੇ ਤੀਜਾ ਸਥਾਨ ਹਾਸਲ ਕੀਤਾ। ਰਜਿਸਟਰਾਰ ਪ੍ਰੋ. (ਡਾ.) ਐੱਸ. ਕੇ. ਅਰੋੜਾ ਨੇ ਵਿਦਿਆਰਥੀਆਂ ਤੇ ਫੈਕਲਟੀ ਦੇ ਯਤਨਾਂ ਦੀ ਸ਼ਲਾਘਾ ਕੀਤੀ।



More Stories
ਪੰਜਾਬ ‘ਚ 274 DSP-ACP ਦੇ ਤਬਾਦਲੇ, ਜਲੰਧਰ ‘ਚ ਵੀ ਵੱਡੀ ਫੇਰਬਦਲ।
ਜਲੰਧਰ ‘ਚ ਨਹਿਰ ‘ਚੋਂ ਮਿਲੀ ਨੌਜਵਾਨ ਦੀ ਲਾਸ਼, ਪਰਿਵਾਰ ਨੇ ਕਤਲ ਕਰਕੇ ਲਾਸ਼ ਸੁੱਟਣ ਦਾ ਲਾਇਆ ਦੋਸ਼।
ਡੀ.ਏ.ਵੀ. ਯੂਨੀਵਰਸਿਟੀ ‘ਚ ਏ.ਆਈ.ਯੂ. ਉੱਤਰੀ ਜ਼ੋਨ ਵਾਲੀਬਾਲ ਚੈਂਪੀਅਨਸ਼ਿਪ ਸ਼ੁਰੂ, 97 ਯੂਨੀਵਰਸਿਟੀਆਂ ਦੀਆਂ ਟੀਮਾਂ ਲੈ ਰਹੀਆਂ ਭਾਗ।