ਅਮਰੀਕੀ ਧਰਤੀ ‘ਤੇ ਫਿਰ ਪੰਜਾਬੀ ਦਾ ਖੂਨ: ਕਪੂਰਥਲਾ ਦੇ ਗੁਰਦੀਪ ਦੀ ਪੀਜ਼ਾ ਡਿਲੀਵਰੀ ਦੌਰਾਨ ਗੋਲੀ ਮਾਰ ਕੇ ਹੱਤਿਆ, ਕਰਜ਼ਾ ਲੈ ਕੇ ਗਿਆ ਸੀ ਵਿਦੇਸ਼।

ਅਮਰੀਕਾ, 24 ਅਗਸਤ : Prime Punjab 

ਅਮਰੀਕਾ ‘ਚ ਇੱਕ ਹੋਰ ਪੰਜਾਬੀ ਨੌਜਵਾਨ ਨੂੰ ਬੇਰਹਿਮੀ ਨਾਲ ਮਾਰ ਦਿੱਤਾ ਗਿਆ। ਇਹ ਮੰਦਭਾਗੀ ਘਟਨਾ ਨਿਊਯਾਰਕ ਸਿਟੀ ‘ਚ ਵਾਪਰੀ ਜਿੱਥੇ ਕਪੂਰਥਲਾ ਦੇ ਬੇਗੋਵਾਲ (ਪਿੰਡ ਜੱਬੋਵਾਲ) ਦੇ 28 ਸਾਲਾ ਗੁਰਦੀਪ ਸਿੰਘ ਦੀ ਇੱਕ ਲੁਟੇਰੇ ਨੇ ਗੋਲੀ ਮਾਰ ਕੇ ਜਾਨ ਲੈ ਲਈ।

ਦੱਸਿਆ ਜਾ ਰਿਹਾ ਹੈ ਕਿ ਗੁਰਦੀਪ ਰਾਤ ਸਮੇਂ ਪੀਜ਼ਾ ਡਿਲੀਵਰ ਕਰਨ ਗਿਆ ਸੀ, ਜਦੋਂ ਰਿਚਮੰਡ ਸਟਰੀਟ ‘ਤੇ ਇੱਕ ਹਥਿਆਰਬੰਦ ਵਿਅਕਤੀ ਨੇ ਉਸਨੂੰ ਨਿਸ਼ਾਨਾ ਬਣਾਇਆ। ਮੌਕੇ ‘ਤੇ ਹੀ ਉਸਦੀ ਮੌਤ ਹੋ ਗਈ। ਪਰਿਵਾਰ ਦਾ ਕਹਿਣਾ ਹੈ ਕਿ ਇਹ ਲੁੱਟ ਦੀ ਵਾਰਦਾਤ ਹੈ।

ਮ੍ਰਿਤਕ ਦੇ ਪਿਤਾ ਪਿਆਰਾ ਲਾਲ ਨੇ ਦੱਸਿਆ ਕਿ ਉਨ੍ਹਾਂ ਨੇ 13 ਸਾਲ ਪਹਿਲਾਂ ਕਰਜ਼ਾ ਲੈ ਕੇ ਪੁੱਤ ਨੂੰ ਚੰਗੇ ਭਵਿੱਖ ਲਈ ਅਮਰੀਕਾ ਭੇਜਿਆ ਸੀ। ਗੁਰਦੀਪ ਅਣਵਿਆਹਿਆ ਸੀ ਅਤੇ ਪਰਿਵਾਰ ਪੰਜਾਬ ‘ਚ ਡੀਜੇ ਦਾ ਕੰਮ ਕਰਦਾ ਹੈ। ਪੁੱਤ ਦੀ ਲਾਸ਼ ਨੂੰ ਭਾਰਤ ਲਿਆਉਣ ਲਈ ਪਰਿਵਾਰ ਨੇ ਸਰਕਾਰ ਤੋਂ ਮਦਦ ਦੀ ਗੁਹਾਰ ਲਾਈ ਹੈ।