Pages

Pages

ਭਿੱਖੀਵਿੰਡ ‘ਚ ਫਿਰ ਚੱਲੀਆਂ ਗੋਲੀਆਂ! ਮੈਡੀਕਲ ਸਟੋਰ ਨੂੰ ਬਣਾਇਆ ਨਿਸ਼ਾਨਾ, ਬਾਜ਼ਾਰ ‘ਚ ਮੱਚੀ ਭਾਜੜ।

ਭਿੱਖੀਵਿੰਡ, 13 ਨਵੰਬਰ : Prime Punjab 

ਭਿੱਖੀਵਿੰਡ ਸ਼ਾਮ ਢਲਦਿਆਂ ਹੀ ਖੇਮਕਰਨ ਰੋਡ ‘ਤੇ ਅਜਿਹਾ ਮੰਜ਼ਰ ਬਣਿਆ ਕਿ ਹਰ ਕੋਈ ਸਹਿਮ ਗਿਆ। ਹੀਰਾ ਮੈਡੀਕਲ ਸਟੋਰ ਦੇ ਬਾਹਰ ਬਾਈਕ ‘ਤੇ ਪੁੱਜੇ ਦੋ ਮੂੰਹ ਢਕੇ ਵਿਅਕਤੀਆਂ ਨੇ ਬਿਨਾਂ ਕੁਝ ਸੋਚੇ ਫਾਇਰਿੰਗ ਸ਼ੁਰੂ ਕਰ ਦਿੱਤੀ। ਇੱਕ ਤੋਂ ਬਾਅਦ ਇੱਕ ਤਿੰਨ ਗੋਲੀਆਂ ਚੱਲੀਆਂ, ਜਿਨ੍ਹਾਂ ਨੇ ਸਟੋਰ ਦਾ ਅਗਲਾ ਸ਼ੀਸ਼ਾ ਤੋੜ ਕੇ ਅੰਦਰ ਤਬਾਹੀ ਮਚਾ ਦਿੱਤੀ। ਚੰਗੀ ਗੱਲ ਇਹ ਰਹੀ ਕਿ ਉਸ ਵੇਲੇ ਕੋਈ ਗਾਹਕ ਜਾਂ ਮੁਲਾਜ਼ਮ ਗੋਲੀ ਦੀ ਲਪੇਟ ‘ਚ ਨਹੀਂ ਆਇਆ।

 

ਸਟੋਰ ਦੇ ਮਾਲਕ ਨਿਤਿਸ਼ ਕੱਕੜ ਦਾ ਕਹਿਣਾ ਹੈ ਕਿ ਹਮਲੇ ਤੋਂ ਕੁਝ ਚਿਰ ਪਹਿਲਾਂ ਉਸਦੇ ਫੋਨ ‘ਤੇ ਬਾਹਰਲੇ ਮੁਲਕ ਦੇ ਨੰਬਰ ਤੋਂ ਵਟਸਐਪ ‘ਤੇ ਫੋਨ ਆਇਆ ਸੀ। ਉਸਨੇ ਉਹ ਫੋਨ ਨਹੀਂ ਸੁਣਿਆ। ਹੁਣ ਸ਼ੱਕ ਜਤਾਇਆ ਜਾ ਰਿਹਾ ਹੈ ਕਿ ਕਿਤੇ ਇਹ ਹਮਲਾ ਉਸੇ ਕਾਲ ਨਾਲ ਤਾਂ ਨਹੀਂ ਜੁੜਿਆ ਹੋਇਆ। ਭਿੱਖੀਵਿੰਡ ਬੈਲਟ ‘ਚ ਇਸ ਤੋਂ ਪਹਿਲਾਂ ਵੀ ਪੈਸੇ ਮੰਗਣ ਦੇ ਚੱਕਰ ‘ਚ ਕਈ ਵਾਰ ਫਾਇਰਿੰਗ ਹੋ ਚੁੱਕੀ ਹੈ, ਜਿਸ ਕਰਕੇ ਦੁਕਾਨਦਾਰਾਂ ਦੇ ਮਨਾਂ ‘ਚ ਡਰ ਬੈਠ ਗਿਆ ਹੈ।

 

ਇਸ ਘਟਨਾ ਮਗਰੋਂ ਬਾਜ਼ਾਰ ਦੇ ਲੋਕਾਂ ‘ਚ ਗੁੱਸੇ ਦੀ ਲਹਿਰ ਹੈ। ਲੋਕਾਂ ਦਾ ਸਵਾਲ ਹੈ ਕਿ ਜੇ ਭਰੀ ਸ਼ਾਮ ਨੂੰ ਬਾਜ਼ਾਰ ‘ਚ ਹੀ ਅਜਿਹਾ ਹੋ ਸਕਦਾ ਹੈ ਤਾਂ ਫਿਰ ਸੁਰੱਖਿਆ ਕਿੱਥੇ ਹੈ? ਉੱਥੇ ਪੁੱਜੇ ਭਾਜਪਾ ਦੇ ਸਿਤਾਰਾ ਸਿੰਘ ਡਲੀਰੀ ਅਤੇ ਡਾ. ਰਿਤੇਸ਼ ਚੋਪੜਾ ਨੇ ਵੀ ਮਾਹੌਲ ‘ਤੇ ਚਿੰਤਾ ਜਤਾਈ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਫਿਰੌਤੀ ਤੇ ਫਾਇਰਿੰਗ ਦੇ ਮਾਮਲੇ ਰੁਕਣ ਦਾ ਨਾਂ ਨਹੀਂ ਲੈ ਰਹੇ ਤੇ ਸਿਸਟਮ ਹੱਥ ‘ਤੇ ਹੱਥ ਧਰੀ ਬੈਠਾ ਹੈ।

 

ਦੂਜੇ ਪਾਸੇ ਪੁਲਿਸ ਨੇ ਆਪਣਾ ਕੰਮ ਸ਼ੁਰੂ ਕਰ ਦਿੱਤਾ ਹੈ। ਨੇੜੇ-ਤੇੜੇ ਲੱਗੇ ਕੈਮਰਿਆਂ ਦੀ ਰਿਕਾਰਡਿੰਗ ਫਰੋਲੀ ਜਾ ਰਹੀ ਹੈ ਤਾਂ ਜੋ ਬਾਈਕ ਸਵਾਰਾਂ ਦਾ ਸੁਰਾਗ ਲੱਗ ਸਕੇ। ਫਿਲਹਾਲ ਦੋਵੇਂ ਹਮਲਾਵਰ ਹੱਥ ਨਹੀਂ ਆਏ। ਦੁਕਾਨਦਾਰਾਂ ਨੇ ਸਾਫ਼ ਕਿਹਾ ਹੈ ਕਿ ਜੇ ਜਲਦੀ ਕਾਰਵਾਈ ਨਾ ਹੋਈ ਤਾਂ ਉਹ ਚੁੱਪ ਨਹੀਂ ਬੈਠਣਗੇ।