ਗੁਰਮੀਤ ਰਾਮ ਰਹੀਮ ਨੂੰ ਮਿਲੀ ਫਿਰ ਛੁੱਟੀ, ਸਵੇਰੇ-ਸਵੇਰੇ ਸੁਨਾਰੀਆ ਜੇਲ੍ਹੋਂ ਨਿਕਲ ਕੇ ਸਿਰਸਾ ਪਹੁੰਚਿਆ।

ਹਰਿਆਣਾ, 25ਅਗਸਤ : Prime Punjab 

ਸਾਧਵੀਆਂ ਦੇ ਯੌਨ ਸ਼ੋਸ਼ਣ ਮਾਮਲੇ ‘ਚ ਸਜ਼ਾ ਭੁਗਤ ਰਹੇ ਡੇਰਾ ਸੱਚਾ ਸੌਦਾ ਦੇ ਮੁਖੀ ਗੁਰਮੀਤ ਸਿੰਘ ਨੂੰ ਹਰਿਆਣਾ ਸਰਕਾਰ ਨੇ ਫਿਰ 21 ਦਿਨਾਂ ਲਈ ਪੈਰੋਲ ‘ਤੇ ਬਾਹਰ ਭੇਜ ਦਿੱਤਾ ਹੈ। ਮੰਗਲਵਾਰ ਤੜਕੇ 6:05 ਵਜੇ ਦੇ ਕਰੀਬ ਸਖਤ ਸੁਰੱਖਿਆ ‘ਚ ਉਸਨੂੰ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ਤੋਂ ਬਾਹਰ ਕੱਢਿਆ ਗਿਆ ਅਤੇ ਉਹ ਆਪਣੇ ਕਾਫਲੇ ਨਾਲ ਸਿਰਸਾ ਲਈ ਰਵਾਨਾ ਹੋ ਗਿਆ।

ਦੱਸ ਦੇਈਏ ਕਿ 2017 ‘ਚ ਪੰਚਕੂਲਾ CBI ਕੋਰਟ ਨੇ ਰਾਮ ਰਹੀਮ ਨੂੰ ਦੋ ਸਾਧਵੀਆਂ ਨਾਲ ਜਬਰ-ਜਨਾਹ ਦਾ ਦੋਸ਼ੀ ਮੰਨਦੇ ਹੋਏ 20 ਸਾਲ ਦੀ ਸਖਤ ਕੈਦ ਸੁਣਾਈ ਸੀ। ਉਸ ਸਮੇਂ ਹੋਏ ਹਿੰਸਕ ਪ੍ਰਦਰਸ਼ਨਾਂ ਤੋਂ ਬਾਅਦ ਉਸਨੂੰ ਰੋਹਤਕ ਦੀ ਹਾਈ-ਸਕਿਓਰਿਟੀ ਸੁਨਾਰੀਆ ਜੇਲ੍ਹ ‘ਚ ਰੱਖਿਆ ਗਿਆ ਸੀ ਜਿੱਥੇ ਉਹ ਲਗਾਤਾਰ ਸਜ਼ਾ ਕੱਟ ਰਿਹਾ ਹੈ।

ਜੇਲ੍ਹ ਰਿਕਾਰਡ ਮੁਤਾਬਕ ਇਹ ਪਹਿਲੀ ਵਾਰ ਨਹੀਂ ਹੈ। ਪਿਛਲੇ ਕਰੀਬ 9 ਸਾਲਾਂ ਦੌਰਾਨ ਰਾਮ ਰਹੀਮ 17 ਵਾਰ ਪੈਰੋਲ ਅਤੇ ਫਰਲੋ ਲੈ ਕੇ ਜੇਲ੍ਹ ਤੋਂ ਬਾਹਰ ਆ ਚੁੱਕਾ ਹੈ। ਇਸ ਸਾਲ ਹੀ ਉਹ ਤੀਜੀ ਵਾਰ ਬਾਹਰ ਆਇਆ ਹੈ। ਪਹਿਲਾਂ 40 ਦਿਨਾਂ ਦੀ ਪੈਰੋਲ ਕੱਟ ਕੇ ਆਇਆ, ਫਿਰ 26 ਮਈ ਤੋਂ 25 ਜੂਨ ਤੱਕ 30 ਦਿਨ ਬਾਹਰ ਰਿਹਾ ਅਤੇ ਹੁਣ ਫਿਰ 21 ਦਿਨਾਂ ਲਈ ਰਿਹਾਅ ਹੋਇਆ ਹੈ।

ਹੋਰ ਦੋ ਵੱਡੇ ਕਤਲ ਕੇਸਾਂ ‘ਚ ਉਸਨੂੰ ਫਿਲਹਾਲ ਰਾਹਤ ਮਿਲੀ ਹੋਈ ਹੈ। ਰਣਜੀਤ ਸਿੰਘ ਕਤਲ ਕੇਸ ‘ਚ ਪੰਜਾਬ-ਹਰਿਆਣਾ ਹਾਈਕੋਰਟ ਨੇ 2024 ‘ਚ ਬਰੀ ਕਰ ਦਿੱਤਾ ਸੀ। ਜਦਕਿ ਪੱਤਰਕਾਰ ਛਤਰਪਤੀ ਕਤਲ ਕੇਸ ‘ਚ ਮਾਰਚ 2026 ‘ਚ ਹਾਈਕੋਰਟ ਨੇ ਉਸਦੀ ਉਮਰ ਕੈਦ ਰੱਦ ਕਰ ਦਿੱਤੀ ਸੀ, ਪਰ ਹੁਣ ਸੁਪਰੀਮ ਕੋਰਟ ਨੇ ਇਸ ਫੈਸਲੇ ਖਿਲਾਫ ਪੀੜਤ ਪਰਿਵਾਰ ਦੀ ਪਟੀਸ਼ਨ ‘ਤੇ ਸੁਣਵਾਈ ਮਨਜ਼ੂਰ ਕਰ ਲਈ ਹੈ।