ਚਰਚਿਤ ਢਿੱਲੋਂ ਭਰਾਵਾਂ ਖ਼ੁਦਕੁਸ਼ੀ ਮਾਮਲਾ: ਕਪੂਰਥਲਾ ਅਦਾਲਤ ਨੇ 3 ਪੁਲਿਸ ਅਧਿਕਾਰੀਆਂ ਨੂੰ ਕੇਸ ‘ਚੋਂ ਕੀਤਾ ਬਰੀ।

ਜਲੰਧਰ/ਕਪੂਰਥਲਾ, 18 ਅਗਸਤ : Prime Punjab 

ਕਪੂਰਥਲਾ ਦੀ ਵਧੀਕ ਸੈਸ਼ਨ ਜੱਜ ਗੁਰਮੀਤ ਟਿਵਾਣਾ ਦੀ ਅਦਾਲਤ ਨੇ ਮੰਗਲਵਾਰ ਨੂੰ ਚਰਚਿਤ ਢਿੱਲੋਂ ਭਰਾਵਾਂ ਖ਼ੁਦਕੁਸ਼ੀ ਮਾਮਲੇ ‘ਚ ਵੱਡਾ ਫੈਸਲਾ ਸੁਣਾਇਆ। ਅਦਾਲਤ ਨੇ ਰਿਕਾਰਡ ‘ਤੇ ਮੌਜੂਦ ਤੱਥਾਂ ਦੇ ਆਧਾਰ ‘ਤੇ ਕਿਹਾ ਕਿ ਮੁਲਜ਼ਮਾਂ ਖ਼ਿਲਾਫ਼ ਖ਼ੁਦਕੁਸ਼ੀ ਲਈ ਉਕਸਾਉਣ ਦਾ ਜੁਰਮ ਨਹੀਂ ਬਣਦਾ। ਇਸ ਲਈ ਤਿੰਨੋਂ ਪੁਲਿਸ ਅਧਿਕਾਰੀਆਂ ਨੂੰ ਕੇਸ ‘ਚੋਂ ਡਿਸਚਾਰਜ ਕਰ ਦਿੱਤਾ ਗਿਆ ਹੈ।

ਬਰੀ ਹੋਣ ਵਾਲਿਆਂ ‘ਚ ਉਸ ਸਮੇਂ ਦੇ ਥਾਣਾ ਡਿਵੀਜ਼ਨ ਨੰਬਰ-1, ਜਲੰਧਰ ਦੇ SHO ਇੰਸਪੈਕਟਰ ਨਵਦੀਪ ਸਿੰਘ, ASI ਬਲਵਿੰਦਰ ਕੁਮਾਰ ਅਤੇ ਮਹਿਲਾ ਕਾਂਸਟੇਬਲ ਜਗਜੀਤ ਕੌਰ ਸ਼ਾਮਲ ਹਨ। ਤਿੰਨਾਂ ਖ਼ਿਲਾਫ਼ ਥਾਣਾ ਤਲਵੰਡੀ ਚੌਧਰੀਆਂ ‘ਚ FIR ਨੰਬਰ 52 ਦਰਜ ਸੀ।

ਇਹ ਮਾਮਲਾ 16 ਅਗਸਤ 2023 ਨਾਲ ਜੁੜਿਆ ਹੈ। ਉਸ ਦਿਨ ਮਨਵਜੀਤ ਸਿੰਘ ਢਿੱਲੋਂ ਦਾ ਜਲੰਧਰ ਥਾਣੇ ‘ਚ ਪੁਲਿਸ ਨਾਲ ਵਿਵਾਦ ਹੋਇਆ ਸੀ। ਪਰਿਵਾਰ ਦਾ ਦੋਸ਼ ਸੀ ਕਿ ਪੁਲਿਸ ਦੇ ਵਿਹਾਰ ਅਤੇ ਕਥਿਤ ਕੁੱਟਮਾਰ ਕਾਰਨ ਮਨਵਜੀਤ ਮਾਨਸਿਕ ਤੌਰ ‘ਤੇ ਪ੍ਰੇਸ਼ਾਨ ਸੀ। ਅਗਲੇ ਦਿਨ ਮਨਵਜੀਤ ਅਤੇ ਉਸਦੇ ਛੋਟੇ ਭਰਾ ਜਸ਼ਨਬੀਰ ਸਿੰਘ ਢਿੱਲੋਂ ਨੇ ਗੋਇੰਦਵਾਲ ਪੁਲ ਤੋਂ ਬਿਆਸ ਦਰਿਆ ‘ਚ ਛਾਲ ਮਾਰ ਦਿੱਤੀ ਸੀ। 2 ਸਤੰਬਰ 2023 ਨੂੰ ਜਸ਼ਨਬੀਰ ਦਾ ਸ਼ਵ ਬਿਆਸ ਕਿਨਾਰੇ ਤੋਂ ਮਿਲਿਆ ਸੀ।

ਜਸ਼ਨਬੀਰ ਦਾ ਸ਼ਵ ਮਿਲਣ ਤੋਂ ਬਾਅਦ 3 ਸਤੰਬਰ 2023 ਨੂੰ IPC ਦੀ ਧਾਰਾ 306, 506 ਅਤੇ 34 ਤਹਿਤ ਕੇਸ ਦਰਜ ਕੀਤਾ ਗਿਆ ਸੀ। ਦੋਸ਼ ਸੀ ਕਿ ਪੁਲਿਸ ਦੀ ਤਸੀਹਿਆਂ ਕਾਰਨ ਦੋਵੇਂ ਭਰਾਵਾਂ ਨੇ ਖ਼ੁਦਕੁਸ਼ੀ ਕੀਤੀ। ਪਰ ਅਦਾਲਤ ਨੇ ਕਿਹਾ ਕਿ ਫਾਈਲ ‘ਤੇ ਮੌਜੂਦ ਸਬੂਤਾਂ ਤੋਂ ਖ਼ੁਦਕੁਸ਼ੀ ਲਈ ਉਕਸਾਉਣਾ ਸਾਬਤ ਨਹੀਂ ਹੁੰਦਾ। FSL ਰਿਪੋਰਟ ‘ਚ ਵੀ ਮੌਤ ਦਾ ਕਾਰਨ ਡੁੱਬਣ ਕਾਰਨ ਦਮ ਘੁੱਟਣਾ ਦੱਸਿਆ ਗਿਆ ਸੀ। DNA ਰਿਪੋਰਟ ਵੀ ਸਪੱਸ਼ਟ ਨਹੀਂ ਆਈ ਸੀ।