“ਯੁੱਧ ਨਸ਼ਿਆਂ ਵਿਰੁੱਧ” – ਨਕੋਦਰ ‘ਚ ਜਲੰਧਰ ਦਿਹਾਤੀ ਪੁਲਿਸ ਦਾ ਵੱਡਾ CASO, 17 FIR ‘ਚ 20 ਤਸਕਰ ਕਾਬੂ।

ਜਲੰਧਰ, 22 ਸਤੰਬਰ : Prime Punjab 

SSP ਹਰਵਿੰਦਰ ਸਿੰਘ ਵਿਰਕ ਦੀ ਅਗਵਾਈ ‘ਚ ਜਲੰਧਰ ਦਿਹਾਤੀ ਪੁਲਿਸ ਨੇ ਸਬ-ਡਿਵੀਜ਼ਨ ਨਕੋਦਰ ‘ਚ ਨਸ਼ਾ ਤਸਕਰੀ ਖਿਲਾਫ ਵਿਸ਼ੇਸ਼ CASO (ਕੋਰਡਨ ਐਂਡ ਸਰਚ ਆਪ੍ਰੇਸ਼ਨ) ਚਲਾਇਆ। DSP ਨਕੋਦਰ ਓਂਕਾਰ ਸਿੰਘ ਬਰਾੜ ਅਤੇ DSP ਟ੍ਰੈਫਿਕ ਮਨਜੀਤ ਸਿੰਘ ਦੀ ਨਿਗਰਾਨੀ ‘ਚ ਟੀਮਾਂ ਨੇ ਨਸ਼ਾ ਪ੍ਰਭਾਵਿਤ ਇਲਾਕਿਆਂ, ਹੌਟਸਪੌਟਸ, ਖਾਲੀ ਮਕਾਨਾਂ ਅਤੇ ਸੁੰਨਸਾਨ ਥਾਵਾਂ ਦੀ ਬਾਰੀਕੀ ਨਾਲ ਤਲਾਸ਼ੀ ਲਈ।

ਕਾਰਵਾਈ ਦੌਰਾਨ ਕੁੱਲ 17 FIR ਦਰਜ ਕਰਕੇ 20 ਮੁਲਜ਼ਮਾਂ ਨੂੰ ਗ੍ਰਿਫਤਾਰ ਕੀਤਾ ਗਿਆ। ਇਨ੍ਹਾਂ ‘ਚੋਂ 16 FIR NDPS ਐਕਟ ਤਹਿਤ 19 ਮੁਲਜ਼ਮਾਂ ‘ਤੇ ਅਤੇ 1 FIR ਆਬਕਾਰੀ ਐਕਟ ਤਹਿਤ 1 ਮੁਲਜ਼ਮ ‘ਤੇ ਦਰਜ ਹੋਈ। ਥਾਣਾ ਵਾਈਜ਼ ਦੇਖੀਏ ਤਾਂ ਥਾਣਾ ਸਦਰ ਨਕੋਦਰ ‘ਚ 6 FIR ‘ਚ 7 ਕਾਬੂ, ਸਿਟੀ ਨਕੋਦਰ ‘ਚ 6 FIR ‘ਚ 8 ਕਾਬੂ ਅਤੇ ਨੂਰਮਹਿਲ ‘ਚ 4 FIR ‘ਚ 4 ਮੁਲਜ਼ਮ ਕਾਬੂ ਆਏ।

ਪੁਲਿਸ ਨੇ ਓਪਰੇਸ਼ਨ ਦੌਰਾਨ 308.15 ਗ੍ਰਾਮ ਹੈਰੋਇਨ, 443 ਨਸ਼ੀਲੀਆਂ ਗੋਲੀਆਂ, 53 ਬਿਨਾਂ ਲੇਬਲ ਵਾਲੇ ਨਸ਼ੀਲੇ ਟੀਕੇ ਅਤੇ 1 ਕਿਲੋ ਭੁੱਕੀ ਚੂਰਾ ਪੋਸਤ ਬਰਾਮਦ ਕੀਤਾ। ਇਸ ਤੋਂ ਇਲਾਵਾ 22 ਬੋਤਲਾਂ ਨਜਾਇਜ਼ ਸ਼ਰਾਬ, ਇੱਕ .32 ਬੋਰ ਪਿਸਤੌਲ, 2 ਮੈਗਜ਼ੀਨ, 1 ਜਿੰਦਾ ਰੌਂਦ, 41,000 ਰੁਪਏ ਦੀ ਡਰੱਗ ਮਨੀ ਅਤੇ ਇੱਕ i20 ਕਾਰ ਵੀ ਬਰਾਮਦ ਹੋਈ ਹੈ।

SSP ਹਰਵਿੰਦਰ ਸਿੰਘ ਵਿਰਕ ਨੇ ਕਿਹਾ ਕਿ “ਯੁੱਧ ਨਸ਼ਿਆਂ ਵਿਰੁੱਧ” ਮੁਹਿੰਮ ਤਹਿਤ ਨਸ਼ਾ ਤਸਕਰਾਂ ‘ਤੇ ਲਗਾਤਾਰ ਸ਼ਿਕੰਜਾ ਕੱਸਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਆਉਣ ਵਾਲੇ ਦਿਨਾਂ ‘ਚ ਵੀ ਨਕੋਦਰ ਦੇ ਸੰਵੇਦਨਸ਼ੀਲ ਇਲਾਕਿਆਂ ‘ਚ ਇਸੇ ਤਰ੍ਹਾਂ ਸਰਚ ਓਪਰੇਸ਼ਨ ਜਾਰੀ ਰਹਿਣਗੇ ਅਤੇ ਨਸ਼ਾ ਸਪਲਾਈ ਨਾਲ ਜੁੜੇ ਹਰ ਵਿਅਕਤੀ ‘ਤੇ ਸਖਤ ਕਾਰਵਾਈ ਹੋਵੇਗੀ।