ਜਗਰਾਓਂ, 09 ਨਵੰਬਰ : Prime Punjab
ਜਗਰਾਓਂ ਦੇ ਨਵੀਂ ਆਬਾਦੀ, ਅਕਾਲਗੜ੍ਹ ਸਾਹਿਬ ਇਲਾਕੇ ‘ਚ ਦੀਵਾਲੀ ਦੀ ਰਾਤ ਕਰੀਬ 9 ਵਜੇ ਇੱਕ ਪਰਿਵਾਰ ਆਪਣੇ ਵੱਡੇ ਭਰਾ ਦੇ ਘਰ ਵਧਾਈ ਦੇਣ ਗਿਆ ਸੀ। ਘਰ ਦੇ ਵੱਡੇ ਹੇਠਾਂ ਬੈਠੇ ਗੱਲਾਂ ਕਰ ਰਹੇ ਸਨ, ਤੇ ਬੱਚੇ ਛੱਤ ‘ਤੇ ਖੁਸ਼ੀ-ਖੁਸ਼ੀ ਆਤਿਸ਼ਬਾਜ਼ੀ ਕਰ ਰਹੇ ਸਨ। ਕਿਸੇ ਨੂੰ ਵੀ ਇਹ ਅੰਦਾਜ਼ਾ ਨਹੀਂ ਸੀ ਕਿ ਕੁਝ ਹੀ ਪਲਾਂ ‘ਚ ਇਹ ਤਿਉਹਾਰ ਉਨ੍ਹਾਂ ਦੀ ਜ਼ਿੰਦਗੀ ਦਾ ਸਭ ਤੋਂ ਵੱਡਾ ਗ਼ਮ ਬਣ ਜਾਵੇਗਾ।
14 ਸਾਲਾ ਗਗਨ ਨੇ ਇੱਕ ਵੱਡੇ ਪਟਾਖੇ ਨੂੰ ਅੱਗ ਲਾਈ ਤੇ ਪਿੱਛੇ ਹਟ ਗਿਆ, ਪਰ ਪਟਾਖਾ ਚੱਲਿਆ ਨਹੀਂ। ਉਸਨੂੰ ਫੁੱਸ ਸਮਝ ਕੇ ਜਦੋਂ ਗਗਨ ਦੁਬਾਰਾ ਉਸਦੇ ਨੇੜੇ ਗਿਆ ਤਾਂ ਅਚਾਨਕ ਜ਼ੋਰਦਾਰ ਧਮਾਕਾ ਹੋ ਗਿਆ। ਧਮਾਕਾ ਇੰਨਾ ਤਾਕਤਵਰ ਸੀ ਕਿ ਬਾਰੂਦ ਦੇ ਤਿੱਖੇ ਟੁਕੜੇ ਸਿੱਧੇ ਉਸਦੀ ਗਰਦਨ ‘ਚ ਜਾ ਵੱਜੇ ਤੇ ਉਹ ਖੂਨ ਨਾਲ ਲੱਥਪੱਥ ਹੋ ਕੇ ਛੱਤ ‘ਤੇ ਹੀ ਡਿੱਗ ਪਿਆ।
ਛੱਤ ‘ਤੇ ਧਮਾਕੇ ਤੇ ਬੱਚਿਆਂ ਦੀਆਂ ਚੀਕਾਂ ਸੁਣ ਕੇ ਹੇਠਾਂ ਮੌਜੂਦ ਪਰਿਵਾਰ ਵਾਲੇ ਭੱਜ ਕੇ ਉੱਪਰ ਪਹੁੰਚੇ। ਗਗਨ ਨੂੰ ਤੁਰੰਤ ਸਰਬਜੀਤ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸਨੂੰ ਬਚਾਉਣ ਦੀ ਪੂਰੀ ਕੋਸ਼ਿਸ਼ ਕੀਤੀ। ਪਰ ਜ਼ਿਆਦਾ ਖੂਨ ਵਹਿ ਜਾਣ ਕਾਰਨ ਇਲਾਜ ਦੌਰਾਨ ਹੀ ਉਸਨੇ ਦਮ ਤੋੜ ਦਿੱਤਾ। ਗਗਨ ਆਪਣੇ ਮਾਪਿਆਂ ਸੁਰੇਸ਼ ਕੁਮਾਰ ਦਾ ਇਕਲੌਤਾ ਬੇਟਾ ਸੀ, ਜਿਸਦੇ ਜਾਣ ਨਾਲ ਪੂਰਾ ਪਰਿਵਾਰ ਉੱਜੜ ਗਿਆ।
ਘਟਨਾ ਦੀ ਸੂਚਨਾ ਮਿਲਦੇ ਹੀ ਸਥਾਨਕ ਪੁਲਿਸ ਨੇ ਕਾਨੂੰਨੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਤੇ ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਬੱਚਿਆਂ ਨੂੰ ਕਦੇ ਵੀ ਇਕੱਲੇ ਪਟਾਖੇ ਨਾ ਚਲਾਉਣ ਦਿੱਤੇ ਜਾਣ, ਹਮੇਸ਼ਾ ਵੱਡਿਆਂ ਦੀ ਨਿਗਰਾਨੀ ‘ਚ ਹੀ ਆਤਿਸ਼ਬਾਜ਼ੀ ਕਰਵਾਈ ਜਾਵੇ। ਪੂਰੇ ਇਲਾਕੇ ‘ਚ ਇਸ ਹਾਦਸੇ ਤੋਂ ਬਾਅਦ ਸੋਗ ਦੀ ਲਹਿਰ ਦੌੜ ਗਈ ਹੈ।


More Stories
ਡੀ.ਏ.ਵੀ. ਯੂਨੀਵਰਸਿਟੀ ‘ਚ ਏ.ਆਈ.ਯੂ. ਉੱਤਰੀ ਜ਼ੋਨ ਵਾਲੀਬਾਲ ਚੈਂਪੀਅਨਸ਼ਿਪ ਸ਼ੁਰੂ, 97 ਯੂਨੀਵਰਸਿਟੀਆਂ ਦੀਆਂ ਟੀਮਾਂ ਲੈ ਰਹੀਆਂ ਭਾਗ।
ASI ਇਕਬਾਲ ਸਿੰਘ ਕਤਲ ਕੇਸ ‘ਚ AGTF ਨੂੰ ਵੱਡੀ ਸਫਲਤਾ, ਦੂਜਾ ਸ਼ੂਟਰ ਅੰਮ੍ਰਿਤਸਰ ਤੋਂ ਗ੍ਰਿਫ਼ਤਾਰ, ਦੋਵੇਂ ਸ਼ੂਟਰ ਕਾਬੂ।
ਗੁਰੂ ਨਾਨਕ ਦੇਵ ਜੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਵਿਸ਼ਾਲ ਨਗਰ ਕੀਰਤਨ ਦਾ ਭਾਜਪਾ ਨੇ ਕੀਤਾ ਸ਼ਾਨਦਾਰ ਸਵਾਗਤ, ਫੁੱਲਾਂ ਦੀ ਵਰਖਾ ਤੇ ਪ੍ਰਸ਼ਾਦ ਵੰਡਿਆ।