ਜਲੰਧਰ ਨਗਰ ਨਿਗਮ ਹਾਊਸ ਮੀਟਿੰਗ ਤੇ ਹੰਗਾਮਾ – ਟੀਟੂ ਬੋਲੇ, “ਲੋਕਾਂ ਦੇ ਮੁੱਦੇ ਰਹਿ ਗਏ, ਸਰਕਾਰ ਨੇ ਸਿਰਫ਼ ਬਜਟ ਪਾਸ ਕਰਨ ਦੀ ਰਸਮ ਕੀਤੀ”।

ਜਲੰਧਰ, 27 ਅਗਸਤ : Prime Punjab 

ਜਲੰਧਰ ਨਗਰ ਨਿਗਮ ਦੀ ਅੱਜ ਹੋਈ ਹਾਊਸ ਮੀਟਿੰਗ ਤੋਂ ਬਾਅਦ ਵਿਰੋਧੀ ਧਿਰ ਦੇ ਨੇਤਾ ਅਤੇ ਵਾਰਡ ਨੰਬਰ 5 ਦੇ ਕੌਂਸਲਰ ਮਨਜੀਤ ਸਿੰਘ ਟੀਟੂ ਨੇ ਸੱਤਾਧਾਰੀ ਧਿਰ ‘ਤੇ ਤਿੱਖਾ ਹਮਲਾ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਨਗਰ ਨਿਗਮ ਬਣਨ ਤੋਂ ਬਾਅਦ ਇਹ ਸਿਰਫ਼ ਚੌਥੀ ਹਾਊਸ ਮੀਟਿੰਗ ਸੀ, ਪਰ ਇਸ ਮੀਟਿੰਗ ਨੂੰ ਲੋਕਾਂ ਦੀਆਂ ਸਮੱਸਿਆਵਾਂ ਦੇ ਹੱਲ ਦੀ ਬਜਾਏ ਸਿਰਫ਼ ਬਜਟ ਪਾਸ ਕਰਨ ਦੀ ਰਸਮ ਬਣਾ ਕੇ ਰੱਖ ਦਿੱਤਾ ਗਿਆ।

ਟੀਟੂ ਨੇ ਦੋਸ਼ ਲਾਇਆ ਕਿ ਕੌਂਸਲਰ ਆਪਣੇ-ਆਪਣੇ ਵਾਰਡਾਂ ਦੀਆਂ ਸਮੱਸਿਆਵਾਂ ਲੈ ਕੇ ਆਏ ਸਨ, ਪਰ ਸੱਤਾਧਾਰੀ ਆਮ ਆਦਮੀ ਪਾਰਟੀ ਨੇ ਪਹਿਲਾਂ ਤੋਂ ਤਿਆਰ ਏਜੰਡੇ ਤਹਿਤ ਚਰਚਾ ਤੋਂ ਬਿਨਾਂ ਹੀ ਬਜਟ ਪਾਸ ਕਰਵਾ ਲਿਆ। ਨਾ ਕੌਂਸਲਰਾਂ ਦੇ ਸਵਾਲਾਂ ਦੇ ਤਸੱਲੀਬਖਸ਼ ਜਵਾਬ ਦਿੱਤੇ ਗਏ ਅਤੇ ਨਾ ਹੀ ਉਨ੍ਹਾਂ ਦੀ ਗੱਲ ਨੂੰ ਤਵੱਜੋ ਦਿੱਤੀ ਗਈ, ਜਿਸ ਨਾਲ ਹਾਊਸ ਦੇ ਲੋਕਤੰਤਰਿਕ ਮਕਸਦ ‘ਤੇ ਹੀ ਸਵਾਲ ਖੜ੍ਹੇ ਹੋ ਗਏ ਹਨ।

ਉਨ੍ਹਾਂ ਕਿਹਾ ਕਿ ਅੱਜ ਜਲੰਧਰ ਦੇ ਕਈ ਇਲਾਕਿਆਂ ‘ਚ ਸੀਵਰੇਜ ਜਾਮ, ਟੁੱਟੀਆਂ ਸੜਕਾਂ ਅਤੇ ਕੂੜੇ ਦੇ ਢੇਰ ਲੋਕਾਂ ਲਈ ਵੱਡੀ ਪਰੇਸ਼ਾਨੀ ਬਣੇ ਹੋਏ ਹਨ। ਲੋਕਾਂ ਨੂੰ ਕਾਗਜ਼ਾਂ ‘ਤੇ ਬਜਟ ਨਹੀਂ, ਸਗੋਂ ਸਾਫ਼ ਸ਼ਹਿਰ, ਚੱਲਣਯੋਗ ਸੜਕਾਂ ਅਤੇ ਠੀਕ ਸੀਵਰੇਜ ਚਾਹੀਦਾ ਹੈ। ਸਿਰਫ਼ ਬਜਟ ਪਾਸ ਕਰਨਾ ਪ੍ਰਾਪਤੀ ਨਹੀਂ, ਪ੍ਰਾਪਤੀ ਤਾਂ ਉਦੋਂ ਹੋਵੇਗੀ ਜਦੋਂ ਪੈਸਾ ਜ਼ਮੀਨ ‘ਤੇ ਲੱਗਦਾ ਦਿਖੇਗਾ।

ਅਖੀਰ ‘ਚ ਟੀਟੂ ਨੇ ਕਿਹਾ ਕਿ ਉਹ ਬਿਨਾਂ ਕਿਸੇ ਸਿਆਸੀ ਦਬਾਅ ਦੇ ਜਲੰਧਰ ਦੇ ਲੋਕਾਂ ਦੇ ਮੁੱਦੇ ਹਾਊਸ ‘ਚ ਮਜ਼ਬੂਤੀ ਨਾਲ ਉਠਾਉਂਦੇ ਰਹਿਣਗੇ। ਸੱਤਾਧਾਰੀ ਧਿਰ ਨੂੰ ਹੁਣ ਦੱਸਣਾ ਪਵੇਗਾ ਕਿ ਬਜਟ ਦਾ ਪੈਸਾ ਕਦੋਂ, ਕਿੰਨਾ ਅਤੇ ਕਿੱਥੇ ਖਰਚ ਹੋਵੇਗਾ। “ਹੁਣ ਸਿਰਫ਼ ਬਜਟ ਪਾਸ ਕਰਨ ਨਾਲ ਕੰਮ ਨਹੀਂ ਚੱਲੇਗਾ, ਜਲੰਧਰ ਦੀ ਜਨਤਾ ਨੂੰ ਨਤੀਜੇ ਚਾਹੀਦੇ ਹਨ ਅਤੇ ਨਿਗਮ ਨੂੰ ਉਨ੍ਹਾਂ ਦਾ ਹਿਸਾਬ ਦੇਣਾ ਪਵੇਗਾ।”